Edebiýat Bölümi

ALTASda Ýaýym Senesi: Nowruz 6, 2004

Bahar Haty

Hüdayi Jan
Terjime: Ylýas Amangeldi

Ýene bahar geldi.
Ýene bir bahar iber maňa
Ýaz ýaly ýazylan hatyň bilen
Gögert perişan ýaýlasyn köňlümiň
Hem baharyň bilen ýaşaýan men bil,
Güýzde-gussada hatyňy maňa ýaşaýyş diýip bil.
Düşündiň?

Seniň bilen aýlandym derýa kenaryn sensiz,
Seniň bilen sensiz galdym ýagyş-ýagmyra,
Sensizlige öwrenşip barýaryn, gözelim, sensiz,
Ýoklugňa-da öwrenşerin, sensiz,
Güýjüm bardyr öwrenşere
Düşündiň.

Ýene bir bahar iber,
Ýene bir bahary alyp gel.
Kagyz bukja guý begenjiň, düýşüňi,
Bir kagyza geçir gaýratyňy, gynanjyň,
Hem bir bahar bol-da gel,
Gülüň bilen, ak terligiň, ysyň bilen gel,
Älemgoşaryňy düýrle-de Sal bukjaňa
Soňra aç bukjaňy ýanymda, şöhle bol gel,
Ýagtylt ömrümü,
Seni seniň bilen göreýin.
Bir bahar bol gel, düşündiň?

Ene

Akmyrat Mäti

Mart 29, 2000. Bu goşgymy 8-nji Mart Baýramy bilen gutlap, Altyn Asyrdaky Türkmen Gyzlaryna ýollaýaryn !!!

Gam-gussadyr hem hijranyň adydyr - Ene,
Param-parça ukylaryň adydyr - Ene,
Göz ýaşlaryň iňňiltiniň adydyr - Ene,
Pida bolan şirin janyň adydyr - Ene;

Mähirden kemal bolan ýürekdir - Ene,
Sabyrdan suw içen daragytdyr - Ene,
Synasy dert doly köňüldür - Ene,
Mähirli söýgüniň adydyr - Ene;

Adamzadyň başydyr, ilkinji Ene,
Maşgalanyň ykbalydyr wepaly Ene,
Nesilleriň geljegidir hakyky Ene,
Kyblagähim Käbäniň taýydyr - Ene;

Dünyäniň iň gözel görküdür - Ene,
Ynsanyň iň mähirli halkydyr - Ene,
Çaganyň iň söýgüli barkydyr - Ene,
Dogalaryň iň kabul elidir - Ene;

Dünýäň baýlyklarna bedeldir - Ene,
Jennet köşklerne laýykdyr - Ene,
Melekler arasynda melekdir - Ene,
Ýöne eneligni ýerine getirýän Ene !

Altas News Agency & Information Center