Talyplyk Ýyllary

Bu synp ýörite ýokary okuw mekdeplerinde okaýan talyplar üçin açylandyr. Başdan geçiren wakalaryňyzy, ýatlamalaryňyzy, makalalaryňyzy, goşgularyňyzy, suratlaryňyzy bu bölümde ýaýymlap bilersiňiz.

Malaýziýadaky Türkmen Talyplary Resmi Topar Zyýarat Etdi

Abdy Rahmanow

Nowruz 13, 2004. Döwlet tarapyndan Petronas firmasy bilen şertnama esasynda 6 ýyldan bäri her ýyl Malaýziýada Petronas Tehniki Uniwersitedinde okamak üçin türkmen talyplary seçip-saýlanylyp iberilýär. Her ýyl ortaça hasapdan Türkmenistanyň dürli künjeklerinden 10 oglan saýlanylyp iberilýär. Şu wagt türkmen talyplarynyň sany 55 töweregi. 5 adam eýýam okuwy gutardy.

Malaýziýanyň paýtagty Kuala Lumpura nebit-gaz pudagynda ösüşi ugrunda geçirilýän bir konferensiýa gelen türkmen delegasiýasy, yzarlaýan Kertih şäherçesindäki desgalary görmek üçin edilmeli ekskursiýa teklibini bir agyzdan yza gaýtaryp, ýerine bärde okaýan türkmen talyplaryny görmek isleýändiklerini dile getiripdirler.

Biz hem olaryň geljegini 2 gün öňünden bildik. Örän tolgundyk, sebäbi bu bizi görmäne zyýarata (gabyr zyýaraty manysynda däl) gelýän ilkinji türkmen delegasiýasydy. Birem biziň bärde ilçihanamyzam bolman soň, bu adatdan daşary ýagdaýdy.

Hoşgüni, Nowruz aýynyň 3-ne Ýolbaşçylyk Edarasynyň seminar otagynda ýygnanşdyk. Myhmanlar birazrak gijigen soň, biz hasam aljyram, olaryň kimdigi nähilidigini has-da bilesimiz gelip ugrady. Öglän sagat 3.00-e ýakyn delegasiýa unwersitedimiziň ygtyýarlylarynyň ýol görkezmesi esasynda seminar eýwanyna girdiler. Malaýziýanyň jokrama yssysynda kostýumly gezip ýören bu adamlaryň, tüýs türkmen ak-ýürek simalary, güler-ýüzleri we watan ugryna gara der döküp ýygyrt düşüren päk maňlaýlary ünsümüzi çekdi.

Zalyň öň tarapyna talyplara ýüzüni aýlap oturdylar. Elbetde gepiň, gürrüňiň nähili ugur aljagyny göz öňümüze getirip ugradyk. Hemişe öwrenşenimiz ýaly resmi ýagdaýdamy, ýa-da “aý senem türkmenmaý?” görnüşindemi? Elbetde birbirimizi doly tanamansoň ýygnak birazrak resmi ýagdaýda geçdi. Delegasiýanyň başynda Blok I Ýolbaşçysy jenap Ýusupserdar Taganow bardy. Ýusupserdar-aga delegasiýasynyň beýleki agzalary bilen-em tanyşdydy. Prezidentimiz Beýik Saparmyrat Türkmenbaşynyň ýanynda resminamalar we ylalaşyklar esasynda işleýän Barlag Bölüminiň müdiri Dädebaý Gazakow, delegasiýanyň iň ýaş agzasydy. Balkannebit Gözleg-agtaryş ýolbaşçy toparynyň baş agzasy jenap Mars Aşyrmämmedow hem, iň ýaşulysydy. Delegasiýanyň beýleki agzalary jp. Baýram Nedirow (Nebitgaz Ministirliginden), jp. Oraznepes Kumşiýew (Türkmennebitden), we bu delegasiýanyň ýany bilen “Petronas Carigali Türkmenistan”dan müdir jp Süleýman Abdylla we hökümet ylalaşykçysy jp. Kakajan Haýytliýew hem bardy.

Umuman ýaşulylarymyz unwersitetdäki oňat şertleriň bardygyna gözýetirendigini, bu şertleri doly manyda ulanmagy, okap oňat bilim alyp, geljekde ülkämize uly goşant goşmagymyzy maslahat berdiler. Şu unwersitedi gutaranlardan uly umytlarynyň bardygyny we uçurumlaryň eýýam döwlet pudaklarynda işe ýerleşdirilendigini aýdanlarynda, gutaran soň iş barada zeýrenmezligi, hökümetde iş tapylmasa hususy kärhanalarda tapyljakdygyny dile getirdi. Watan borjumyz bolan harby gullyk meselesine gelende, sagdyn we agzalary (organlary) düzüw bolan herbir erkek raýat harby gullyk etmäne borçludyr, emma ÝOM-i gutaranlara, pudaklaryna ýakyn ýerde gullyk etmäne şert döredilip biljekdigi aýdyldy. Türkmenistandaky uly galkynyşyň bardygyny dile getiren delegasiýa, bu işiň özlerinden soň şu wagtky ýaş nesil dowam etdirmeli boljakdygyny, şol sebäpli okuwda hiçhili gowşaklyk etmän okamagy maslahat berdi. Talyplardan bolsa unwersitetde ülkämiziň adyny duýurmak, we abraýyny saklamak barada edilýän medeni çäreler, agzybir alnyp barýan jemgiýet işleri barada maglumat berdiler.

Gürrüň howasy ýygnakdan soň çaý başynda has-da ýylady. Talyplaryň delegasiýa, delegasiýanyňam talyplara soraglarynyň yzy üzülmedi. Talyplaryň sowallary praktika, aspirantura, gullyk ýaly mowzuklaryň daşynda aýlandy. Delegasiýa bolsa öz sowallaryny ýerli halk barada, naharlary, däpleri, umumy döwletiň ýagdaýy barada, uniwersitetde kynçylyk çekilýän halatynda nirelere ýüz tutulýandygy baradaky töwerekde geldi.

4-5 günlik syýahatynyň üçünji güni amala aşyrylan bu sapar tamamlananda garşylykly surada düşüp, yzyndan hoşlaşmak bilen tamamlandy. Delegasiýany ýörite gorag gullugy ýolbaşçylygynda paýtagt Kuala Lumpura ugradyldy.

Öňki Ýazgylar

· 13.03.2004. Türkmen Delegasiýanyň Malaýziýadaky Talyplary Zyýaraty

· 06.03.2004. Türkiýede Okaýan Türkmen Talyplarynyň Aragatnaşyk Merkezi

Altas News Agency & Information Center