Ynsanlyk Ýazgydy

Size Garşy Göterilen Eller Gurasyn!

Eziz Annamyradow

Gurbansoltan 2, 2004. Kakasy uly işde işleýän käbir ýaşlaryň hondan bärsi bolup şäherde maşyn tozadyp uçuryp ýörendigini görmek elmydama mümkin.

Bularyň hiçkime azary ýetmän, näme haram işleriň yzyndan kowalaýanam bolsa hiç welin, ýaňy ýakynda bir dostum, şolaryň käbirleri bir zada gazaplanan mahaly gyşyň sowugy, ýazy yssysy diýmän şäheriň köçelerini arassalap ýören päk ýürekli daýzalary bilgeşleýin kakyp geçip, gaharlaryny şolardan çykarýanlarynyňam bardygyny eşitdim welin, ýeňsämden aşak dogry sowuk bir der akdy.

Ol garamaýak daýzanyň arkasy ýok diýip beýle wagşylyk edibermelimikä? Asuda, abadan ýurtda bu iljirewik ministir çagalarynyň ýetmeýän zady nämekä? Dogry, ene-atasy işläp belli bir dereje zähmet çekip, der döküp baýlyk ýygnan ene-atasynyň çeken kynçylyklaryny özleri çekmän soň, beýle bolar-bolmaz zatlar edip ýörendir. Elbetde meşgul ene-atasynyň bu weýrançylykdan habary hem ýokdyr.

Dogrusy ol daýzalar öýündäki garagöz çagajyklaryna ryzkyny ýetrijek bolup, gara der işleýär. Alýan aýlygy iýjek-işjegine ýeterlik, emma baý maşgalalaryňky ýaly keýpe-sepalata sowarlyk ýetenok-am. Ol daýzalara käte awtobuslara ýer berilmeýär-em, gynansak-da.

Eý Allajan! Sen örän adyl! Kimlerini sylaýaň, kimlerini synaýaň! Synagygda bize mizemez, ummasyz sabyr ber! Arkasy bolmadyklara arka çyk, eý Halyk, eý Rahman, eý Jepbar! Dostlardan iň sadyk, iň wepaly sensiň! Dosty bolmadyklara, wepalylyk et, el uzat, eý Hudaý!

Geç Günämi, Daýza!

Eziz Annamyradow

Nowruz 5, 2004. 2002-nji ýylyň Bitaraplyk aýydy. Aşgabatda Winzawodyň ýanydan geçip barýardym. Bir ýerde işim bardy, howlukmaçdym. Birdenem sähel öňrägimde bir daýza elinde agyr ýük, kiçiräjik ogly bilen bir ýere barýandygyny gördim. Çalt ýöräp olary geçip barýarkam daýza maňa ýüzlenip: “Jigim, şu sumkamy şol swetofora çenli göterişip bilermiň?”, diýip, daýzanyň päk ýüzünden, süýji dilinden beýle süýji ýagdaýda sözleriňi dökülişi içimden geçdi. Bir bada Aeroprtdaky Ystanbuldan gelýärkäk aeroprtdaky söwdegär daýzalaryň ýüküni göterişmäne kömek soranlarynda göni ýok diýip öwrenşip gidenimdenmi, näme, şol daýza-da “Daýza men howlukmaç,” diýip sypaýçylyk edenimi duýmany galdym. Bir salym ýöränden soň beýnimden atylan ýaly boldym, emma yzyma dolanyp daýzanyň agyr ýüküni göterişmäne batyrlyk ýygnap bilmedim.

Eý, Hudaý Jan! Sen meni synagdan geçirdiň, men bolsa ýykyldym. Bagyşla eden günämi! Bu tenimi, güýç kuwwatymy beren Sen! Bu saglykly amanadyňy Seniň ugruňda bir adam kömekleşip ulanyp bilmek pursady elime geçen mahalyna depip goýberdim.

Eý, Alla Jan! Maňa şol pursady gaýtadan ber! Şol daýzany maňa gaýtadan duşur. Ýüki ýeke çyra çenli däl, öýüne çenli hem eltip bererin.

Eý, daýza! Senem meniň günämi geç! Kim bilýär belki sen keselhanadaky bir hassa ýakynyňa nahar äkidip barýardyň. Belk-em esger ogluňa görmäne uzagrak bir ýerden gelipdiň. Belkem wokzala otla ýetişjek bolup howlugyp barýardyň.

Nirä barýardyň bilemok, emma meniň öz ejemiň ýerinde şeýle ýagdaýa düşmegini islemezdim dogrusy. Bir-em birinden kömek sorandan soň el uzadylmasa ikinji adama soramana ýüz bolmaýar. Seni beýle umytdan-am düşürenim üçin-em bagyşla, daýza!

Altas News Agency & Information Center